काठमाडौं । मधेश प्रदेशका विभिन्न जिल्लामा यतिखेर हुण्डी रकमको कारोबार एवं ओसार पसार मौलाएको छ।
वित्तीय अपराधीहरूले विभिन्न माध्यमबाट भारतको सीमावर्ती क्षेत्रबाट अवैध तरीकाले रकम ओसार पसार गर्न तल्लिन रहेको पछिल्लो घटना क्रमले पुष्टि गरेको छ।
यसैबीच हुण्डी कारोबार अन्तर्गत अवैध तरीकाले भित्र्याइएको १० लाख रुपैयाँसहित एक भारतीय नागरिकलाई सशस्त्र प्रहरी सशस्त्र प्रहरी बल नेपालले वीरगञ्जबाट रुपैयाँसहित पक्राउ गरेको छ।
मंगलबार दिउँसो १ बजेको समयमा वीरगंज-१६ स्थित भन्सार रोडमा सशस्त्र प्रहरी बल नं.१३ गण हे.क्वा.पर्सा र प्रस्तावित सीमा सुरक्षा गुल्म बीरगंजबाट खटिएको संयुक्त टोलीले भारतबाट नेपाल तर्फ आउँदै गरेको BR05AR 8101 नं.को मोटर साइकलमा सवार भारतीय नागरिकलाई चेकजाँच गर्ने क्रममा निजले प्रयोग गरेको हेलमेट भित्र लुकाई छिपाई ल्याउँदै गरेको श्रोत नखुलेको नेपाली १० लाख रुपैयाँसहित आवश्यक कारबाहीको लागि वीरगंज भन्सार कार्यालयमा बुझाईएको सशस्त्र प्रहरी बल नेपाल नं. १३ गण, हेक्वा पर्साका सूचना अधिकारी डिएसपी संगम श्रेष्ठले बताए।
