काठमाडौँ। नेपाली बजारमा फेरी चिनीको अभाव बढ्दै गरेको छ । दसैँदेखि अभाव भएको चिनीको आपूर्तिमा सरकारले विशेष ध्यान नदिएकाले बजारमा चिनीको अभाव अहिले फेरी चुलिएको छ । सरकारसँग स्टकमा चिनी नभएको र भारतबाट जी–टु–जी प्रक्रियाबाट ल्याउने भनिएको चिनी पनि मूल्य र गुणस्तर नमिल्दा ल्याउन नसकिएकाले बजारमा चिनीको अभाव देखिएको छ ।
खुद्रा व्यापार सङ्घका उपाध्यक्ष ध्रुवप्रसाद अधिकारी अहिले बजारमा चिनीको अभाव चुलिएको बताए । ग्राहकहरू अहिले चिनी खरिदका लागि पसल पुग्दा रित्तो हात फर्कनुपर्ने अवस्था रहेको उनको भनाइ छ । उनले भने, “अहिले बजारमा चिनीको अभाव चुलिएको छ । ग्राहकहरू पसलमा चिनी खरिदको लागि पुग्दा रित्तो हात फर्कनुपर्ने अवस्था छ ।” उहाँका अनुसार अहिले व्यापारीहरूले समेत कतै चिनी किन्न पाएका छैनन् । पछिल्लो पाँच दिन यता चिनीका ग्राहकहरू रित्तो हात फर्कनुपरेको उनको दाबी छ ।
उनले भने, “खुद्रा व्यापारीहरूले समेत चिनी खरिद गर्न पाएका छैनन् । साल्ट ट्रेडिङ् कर्पोरेसन र खाद्य, व्यवस्था तथा व्यापार कम्पनी लिमिटेडले पनि बजारमा चिनी पठाएका छैनन् । चिनीको अभाव चुलिएको छ ।”
केही दिनमै चिनी उपलब्ध हुन्छ
पछिल्लो पाँच दिन यता देखिएको चिनीको अभाव केही दिनमै समाधान हुने उद्योग वाणिज्य तथा संरक्षण विभागले जनाएको छ । विभागका प्रवक्ता आनन्दराज पोखरेलका अनुसार सूचना प्रवाहको कमजोरीका कारण मात्र बजारमा चिनीको अभाव भएको हो । उनले भने, “बजारमा समन्वयको अभावका कारण चिनीको अभाव भएको हो । केही दिनमा नै यो समस्या समाधान हुन्छ । ”
उनका अनुसार अहिले दैनिक पाँच–छ ट्रक चिनी आयात भइरहेकाले खुद्रा व्यापारीले डिलरहरूसँग सम्पर्क गरेर लिन सकिनेछ । अहिले उखुको क्रसिङ् सिजन सुरु भएकाले चिनीको अभाव लामो समय नजाने उहाँको भनाइ छ । अहिले छ उद्योगले चिनी उत्पादन सुरु गरिसकेकाले चिनीको अभाव केही दिनमा नै हट्ने उनले बताए ।
प्रवक्ता पोखरेलले भने, “अहिले छ उद्योगले चिनी उत्पादन सुरु गरिसकेका छन् । बजारमा पनि दैनिक पाँच–छ ट्रक चिनी आइरहेको छ । त्यसैले चिनीको अभाव केही दिनमै समाधान हुनेछ ।”
यस्तै, उद्योग वाणिज्य तथा आपूर्ति मन्त्रालयका प्रवक्ता गजेन्द्रकुमार ठाकुरका अनुसार अहिले बजारमा देखिएको चिनीको अभाव दुई–तीन दिनमा समाधान हुनेछ । उपत्यका बाहिरका जिल्लाहरूमा चिनीको आपूर्तिमा कुनै समस्या नरहेको र उपत्यकाभित्र मात्र चिनी नआएकाले यो समस्या केही दिनमा नै समाधान हुने उनको भनाइ छ ।
चिनी उत्पादन बढ्ने आङ्कलन
यस वर्ष चिनी उत्पादन बढ्ने आङ्कलन गरिएको छ । उद्योग,वाणिज्य तथा आपूर्ति संरक्षण विभागका प्रवक्ता पोखरेलका अनुसार यस वर्ष चिनीको उत्पादन बढेर दुई लाख ३० हजार टन पुग्ने आङ्कलन गरिएको छ । गतबर्ष नेपालमा चिनीको उत्पादन एक लाख ७५ हजार टन हाराहारीमा रहेको थियो ।
