रानी कुमारी, रौतहट ।
भदौँ २९ गते, शनिबार ।
मोरङको ग्रामथान गाउँपालिकामा आज एक ऐतिहासिक घटना घटेको छ। नेकपा माओवादी केन्द्रद्वारा आयोजित एक विशेष पार्टी प्रवेश कार्यक्रममा विभिन्न पार्टीका नेता तथा कार्यकर्ताहरूले आफ्नो पुरानो दल परित्याग गर्दै नेकपा माओवादी केन्द्रमा प्रवेश गरेका छन्। यो कार्यक्रम स्थानीय राजनीतिमा ठूलो चर्चा र चासोको विषय बनेको छ।
यस कार्यक्रममा नेकपा माओवादी केन्द्रका केन्द्रिय अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ प्रमुख अतिथिका रूपमा उपस्थित थिए। प्रचण्डको आगमनले कार्यक्रमको गरिमा बढाएको थियो। ग्रामथान गाउँपालिका वडा नम्बर ४ का वडाध्यक्ष रमेश भगतको अध्यक्षतामा सम्पन्न भएको उक्त कार्यक्रममा स्थानीय जनता, नेता तथा कार्यकर्ताहरूको व्यापक उपस्थिति रहेको थियो। कार्यक्रमको सुरुवातमा नै स्वागत मन्तव्य राख्दै रमेश भगतले सबैलाई हार्दिक स्वागत गरे। उनले भने, “आजको यो विशेष कार्यक्रम ग्रामथान गाउँपालिकाको राजनीतिक इतिहासमा एउटा कोसेढुंगा सावित हुने छ।”उक्त कार्यक्रमको मुख्य आकर्षण भनेको विभिन्न राजनीतिक दलका नेता तथा कार्यकर्ताहरूको नेकपा माओवादी केन्द्रमा प्रवेश गर्नु हो। कांग्रेस, एमाले, राप्रपा, लगायतका विभिन्न पार्टीहरूमा लामो समयदेखि क्रियाशील रहेका नेताहरूले माओवादी केन्द्रमा प्रवेश गरेको खबरले राष्ट्रिय राजनीतिक वृत्तमा तरंग ल्याएको छ।
यस पार्टी प्रवेश कार्यक्रममा लगभग ८०० जना नेता तथा कार्यकर्ताहरूले माओवादी केन्द्रको सदस्यता लिएका छन्।कार्यक्रमलाई सम्बोधन गर्दै पुष्पकमल दाहाल ‘प्रचण्ड’ ले माओवादी केन्द्र नै देशको एक मात्र जनपक्षीय, गरिब र श्रमिकहरूको पार्टी भएको भन्दै नवप्रवेशीहरूलाई स्वागत गरे। उनले भने, “माओवादी केन्द्र सधैं गरिब, मजदुर, किसान र उत्पीडित समुदायको पक्षमा उभिएको छ। यसले समाजवाद र समतामूलक समाज निर्माणको लागि संघर्ष गर्दै आएको छ।
आज यहाँ आएका सबैलाई हाम्रो पार्टीमा स्वागत गर्दछु। हामीसँग मिलेर समाज परिवर्तनको अभियानमा जुट्न आह्वान गर्दछु।”प्रचण्डले देशमा राजनीतिक स्थायित्व, आर्थिक विकास र सामाजिक न्याय स्थापनाका लागि माओवादी केन्द्रको भूमिका महत्वपूर्ण रहेको उल्लेख गरे। “देशलाई समृद्ध बनाउने, जनताको चाहना पूरा गर्ने र समाजलाई समानतामूलक बनाउने अभियानमा हामीलाई सबैको साथ आवश्यक छ,” उनले भने।उक्त कार्यक्रममा उपस्थित नवप्रवेशीहरूले माओवादी केन्द्रको विचारधारा र पार्टीले अघि सारेको कार्यक्रमप्रति आफ्नो आस्था रहेको बताएका छन्।
उनीहरूले माओवादी केन्द्रलाई गरिब, श्रमिक, किसान र उत्पीडितहरूको एक मात्र वास्तविक पार्टी भएको भन्दै प्रवेश गरेको बताए। “हामीले माओवादी केन्द्रको नीति र सिद्धान्तप्रति विश्वास राखेर यो पार्टीमा प्रवेश गरेका हौँ,” एक नवप्रवेशी नेताले भने, “यो पार्टीले मात्रै देशलाई समृद्धि, समानता र न्याय दिलाउन सक्छ।”कार्यक्रममा विभिन्न सांस्कृतिक प्रस्तुतिहरू पनि प्रस्तुत गरिएको थियो। स्थानीय कलाकारहरूले माओवादी आन्दोलनका गीतहरू प्रस्तुत गर्दा माहोल उत्साहजनक बनेको थियो। त्यस्तै, कार्यक्रममा सहभागी सबैलाई पार्टीको सदस्यता प्रमाणपत्र वितरण गरिएको थियो।पार्टी प्रवेश कार्यक्रममा माओवादी केन्द्रका स्थानीय नेताहरू, प्रदेशस्तरीय नेता, कार्यकर्ता तथा ग्रामथान गाउँपालिकाका नागरिकहरूको उल्लेख्य उपस्थिति रहेको थियो।
कार्यक्रममा सहभागीहरूले माओवादी केन्द्रप्रति आफ्नो समर्थन र विश्वास प्रकट गरेका थिए। यस पार्टी प्रवेशले ग्रामथान गाउँपालिकाको राजनीतिक वातावरणमा नयाँ ऊर्जा थप्ने विश्वास गरिएको छ।यस प्रकार, ग्रामथान गाउँपालिकामा सम्पन्न यो पार्टी प्रवेश कार्यक्रमले स्थानीय राजनीतिमा मात्र नभई राष्ट्रिय तहमा समेत माओवादी केन्द्रको लोकप्रियता र सशक्त उपस्थिति देखाएको छ। पार्टीले आगामी दिनहरूमा नवप्रवेशीहरूलाई संगठित गरी जनहितका मुद्दाहरूमा संघर्ष जारी राख्ने प्रतिवद्धता जनाएको छ।
