प्रदिप कुमार दास, रौतहट ।
असोज ०२ गते, बुधबार ।
आम जनता पार्टीले असोज ३ गते संविधानप्रति असन्तुष्टि व्यक्त गर्न विशेष कार्यक्रमसहित संविधानको अन्त्येष्टि यात्रा निकाल्ने तयारी गरेको छ। पार्टीका अध्यक्ष तथा पूर्वमन्त्री प्रभु साहले वर्तमान संविधानले नेपाली जनताको आवश्यकता र चाहना पूरा गर्न नसकेकोले यसलाई खारेज गर्नुपर्ने बताएका छन्। उनले यो संविधानलाई “ककटेल” संविधानको संज्ञा दिँदै यसको खारेजीको माग गरेका छन्।
प्रभु साहका अनुसार संविधानले जनताको हकअधिकारलाई स्पष्ट रूपमा सम्बोधन गर्न सकेको छैन। संविधानमा जनताको वास्तविक आवश्यकता र आकांक्षालाई सम्बोधन नगरेको भन्दै उनले संविधानमा भएका विभिन्न व्यवस्थाहरूले जनतालाई थप अन्याय, विभेद र असमानताको अवस्थाबाट गुजारिरहेको आरोप लगाए। साहले संविधानको नाममा भइरहेको समस्याहरूको समाधानका लागि संविधानको खारेजी नै एक मात्र विकल्प भएको बताए।साहले संविधानलाई “ककटेल” संविधानको संज्ञा दिँदै भने, “यो संविधान विभिन्न राजनीतिक शक्तिहरूको स्वार्थको मिश्रण भएकोले नेपाली जनताको वास्तविक समस्याहरूको समाधान गर्न असफल भएको छ।”
उनले भनें, “यसले न त न्यायसंगत समाजको निर्माण गर्न सकेको छ, न त जनताको आकांक्षालाई सम्बोधन गर्न। यसले केवल केही विशिष्ट वर्ग र समुदायको स्वार्थलाई संरक्षण गरेको छ।”आम जनता पार्टीले असोज ३ गते आयोजना गर्न लागेको अन्त्येष्टि यात्रामा पार्टीका प्रमुख नेताहरू, कार्यकर्ता र समर्थकहरूको व्यापक सहभागिता रहनेछ।
यस यात्राको उद्देश्य संविधानप्रति असन्तुष्ट जनसमुदायलाई एकीकृत गर्दै संविधानको खारेजीका लागि जनमत तयार पार्नु रहेको छ।यात्राको क्रममा विभिन्न ठाउँमा जनसभाहरू आयोजना गरिने र संविधानका विभिन्न पक्षहरूबारे जनतालाई जानकारी गराइनेछ। पार्टीका नेताहरूले संविधान खारेजीपछि कस्तो खालको संविधान निर्माण गर्नुपर्ने भन्ने विषयमा जनतासँग संवाद गर्ने योजना बनाएको छ। साहले भने, “हामी नयाँ संविधान निर्माणका लागि जनताको साथ र समर्थन जुटाउनेछौं। यो संविधानले दिएका समस्या समाधान गर्न नयाँ संविधान नै आवश्यक छ।”आम जनता पार्टीको यो कदमले संविधानप्रति जनतामा रहेको असन्तुष्टिलाई अभिव्यक्त गरेको छ।
यसले देशमा नयाँ राजनीतिक विमर्शको सुरुवात गर्ने संकेत गरेको छ। पार्टीले यस यात्राका माध्यमबाट संविधानको खारेजीका लागि दबाब सिर्जना गर्दै नयाँ संविधान निर्माणका लागि पहल गर्न सरकार र राजनीतिक दलहरूलाई आह्वान गर्नेछ।
