प्रदिप कुमार दास, रौतहट ।
असोज १३ गते , आईतवार ।
जनता समाजवादी पार्टी नेपाल, रौतहट जिल्ला कार्यसमितीका अध्यक्ष श्याम बिहारी यादवले देशभर लगातार भएको भारी वर्षाका कारण उत्पन्न बाढी र पहिरोले पुर्याएको ठूलो भौतिक र मानवीय क्षतिप्रति गहिरो दुःख व्यक्त गरेका छन्। विशेष गरी रौतहट जिल्लामा बाढीका कारण भएका क्षतिबाट पीडितहरूलाई समवेदना प्रकट गर्दै यादवले दिवङ्गत आत्माहरूको शान्तिको कामना गर्दै शोकाकुल परिवारजनप्रति गहिरो समवेदना प्रकट गरेका छन्। साथै, घाइतेहरूको शीघ्र स्वास्थ्यलाभको कामना गर्दै अझै पनि बेपत्ता भएकाहरूको खोजीमा सुरक्षा निकाय र स्थानीय प्रशासनले विशेष ध्यान दिनुपर्नेमा जोड दिएका छन्।
रौतहटमा भएको भारी वर्षाले बागमती, लालबकैया, झाझलगायतका नदीहरूमा पानीको सतह अत्यधिक बढेपछि विभिन्न स्थानका बाँधहरू भत्किएका छन्। यस कारणले माधवनारायण, गढीमाइ, बृन्दावन, गरुडा, फतुवा बिजयपुर, कटहरिया, मौलापुर, देवाही गोनाही, राजपुर, ईशनाथ, परोहा, गौर, र राजदेवी नगरपालिकालगायतका स्थानहरूमा डुबानको समस्या उत्पन्न भएको छ। यी क्षेत्रहरूमा सयौं गाउँहरू पूर्ण रूपमा पानीमा डुबेका छन्, जसले गर्दा धेरै परिवार घरबारविहीन भएका छन्।
बाढीले मानवीय क्षति धेरै नभए पनि ठूलो मात्रामा भौतिक सम्पत्तिमा क्षति पुगेको छ। घरहरूमा रहेको सामानहरू बर्बाद भएका छन्, र बाढीले ल्याएको डुबानका कारण हजारौं बिघामा लगाइएको धानबाली नष्ट भएको छ। यो क्षतिले गर्दा किसानहरूको आर्थिक जीवन थप कठिन बनेको छ। धानबालीमा पुगेको क्षति र घरबारविहीन परिवारहरूको अवस्था अत्यन्तै दयनीय बनेको छ, जसले गर्दा तत्काल उद्धार तथा राहत कार्यको खाँचो छ।
अध्यक्ष यादवले बाढीबाट प्रभावित किसानहरूको समस्यालाई विशेष रूपमा उजागर गरेका छन्। धानबाली नष्ट भएपछि किसानहरूको आर्थिक अवस्था झन् संकटग्रस्त भएको छ। यस्तो अवस्थामा पीडित किसानहरूलाई क्षतिपूर्ति प्रदान गर्न तीनै तहका सरकारहरूलाई उनले जोडदार माग गरेका छन्। उनले किसानहरूको पीडालाई ध्यानमा राखी तत्काल राहतका कार्यक्रमहरू लागू गर्न र उनीहरूलाई आवश्यक सहयोग प्रदान गर्न आग्रह गरेका छन्।
जनता समाजवादी पार्टीका जिल्ला अध्यक्ष श्याम बिहारी यादवले पार्टीका सम्पूर्ण नेता तथा कार्यकर्ताहरूलाई बाढी पीडित क्षेत्रहरूमा उद्धार तथा राहत कार्यमा जुट्न आह्वान गरेका छन्। उनले पार्टीका सदस्यहरूलाई पीडितहरूलाई सहयोग गर्न, खाना र बसोबासको व्यवस्था मिलाउन सक्रिय हुन भनेका छन्। बाढीले गर्दा उत्पन्न संकटले गर्दा अहिले प्रभावित परिवारहरूलाई जीवनयापन गर्न कठिनाइ भएको भन्दै, यादवले तत्काल उद्धार कार्यमा जुट्न सबैलाई प्रेरित गरेका छन्।
यादवले बाढी प्रभावित क्षेत्रमा तत्काल उद्धार तथा राहत कार्य सञ्चालन गर्न संघीय, प्रदेश, र स्थानीय सरकारलाई विशेष अपिल गरेका छन्। उनले सुरक्षा निकाय, जनप्रतिनिधि, राष्ट्रिय विपद् जोखिम न्यूनीकरण तथा व्यवस्थापन प्राधिकरण, कर्मचारी वर्ग र सामाजिक संघसंस्थाहरूलाई पीडित परिवारहरूको जीवन रक्षा गर्नका लागि सक्रियतापूर्वक काम गर्न आग्रह गरेका छन्।
विपद्को यस घडीमा नागरिकहरूको जीवन रक्षाका लागि तीनै तहका सरकार र सम्बद्ध निकायहरूले द्रुत र प्रभावकारी ढंगले उद्धार तथा राहतको कार्यक्रम सञ्चालन गर्नुपर्ने आवश्यकतामा यादवले जोड दिएका छन्। साथै, उनले पीडित परिवारको पुनर्स्थापनाका लागि लामो समयसम्म सहायताका कार्यक्रमहरू सञ्चालन गर्नुपर्नेमा पनि विशेष ध्यान दिन आग्रह गरेका छन्।
