रानी साह,रौतहट ।
फाल्गुन ०२ गते ,शुक्रबार ।
रौतहट जिल्लाको मौलापुर नगरपालिकामा आयोजना हुन गइरहेको मौलापुर मधानी महोत्सव २०८१ को तयारी तीव्र रूपमा अगाडि बढिरहेको छ। महोत्सवको सम्पूर्ण तयारीलाई अझ व्यवस्थित बनाउन र हालसम्म भएका उपलब्धिहरूको समीक्षा गर्न आज संघीय सांसद तथा जनता समाजवादी पार्टी (आजपा) का अध्यक्ष एवं पूर्वमन्त्री माननीय प्रभु साहले स्थलगत अवलोकन गर्नुभएको छ।
स्थलगत अवलोकन गर्नु अघि उहाँले मौलापुर मधानी महोत्सव मूल आयोजक समिति तथा विभिन्न उपसमितिका संयोजकहरूसँग विस्तृत छलफल गर्नुभएको थियो। छलफलको क्रममा महोत्सवको तयारीका सन्दर्भमा हालसम्म भएका प्रगतिहरू, सामना गर्नुपर्ने सम्भावित चुनौतीहरू तथा समाधानका उपायहरूबारे गहन समीक्षा गरिएको थियो। सहभागीहरूसँगको संवादपछि सांसद साहले महोत्सवलाई सफलतापूर्वक सम्पन्न गर्न आवश्यक निर्देशन प्रदान गर्नुभयो। उहाँले विशेष रूपमा महोत्सवलाई थप व्यवस्थित, प्रभावकारी तथा सबै पक्षको सहभागिता सुनिश्चित हुने गरी अघि बढाउन उपयुक्त रणनीति बनाउन सुझाव दिनुभयो।
उक्त छलफल तथा अवलोकन कार्यक्रममा आजपा स्थायी समिति सदस्य अमर साह, आजपा नेता राजन यादव, मौलापुर नगरपालिकाका मेयर एवं मूल समारोह समितिका संयोजक रिना कुमारी साह, प्रमुख प्रशासकीय अधिकृत रामबाबु प्रसाद साह, नगर कार्यपालिकाका सदस्यहरू, वडा अध्यक्षहरू, पालिकाभित्रका विद्यालयका प्रधानाध्यापकहरू, पालिका कर्मचारीहरू, आजपा निकट आम विद्यार्थी मोर्चाका अध्यक्ष विवेक साह, युवा नेता बालाशंकर कुशवाहा, स्थानीय समाजसेवी तथा विशिष्ट व्यक्तित्वहरूको उल्लेखनीय उपस्थिति रहेको थियो।
छलफलका क्रममा सहभागीहरूले महोत्सवको विशेषता, सांस्कृतिक कार्यक्रम, व्यापारिक प्रदर्शनी, स्थानीय उत्पादन प्रवर्द्धन तथा जनसहभागिता सुनिश्चित गर्ने उपायहरूबारे सुझाव राखेका थिए। महोत्सवलाई थप भव्य बनाउने उद्देश्यसहित सांसद साहले आर्थिक, व्यवस्थापकीय र प्रवर्द्धनात्मक पक्षलाई अझ मजबुत बनाउने उपायहरू खोज्न निर्देशन दिनुभयो। साथै, उहाँले महोत्सवको प्रचार-प्रसार, सुरक्षा व्यवस्थापन तथा आम नागरिकको सहभागिता सुनिश्चित गर्न सम्बन्धित निकायहरूसँग समन्वय गर्नुपर्ने आवश्यकता औंल्याउनुभयो ।
मौलापुर मधानी महोत्सव रौतहट जिल्लामा मात्र नभई मधेस प्रदेशकै एक महत्वपूर्ण सांस्कृतिक महोत्सवको रूपमा स्थापित हुँदै आएको छ। स्थानीय परम्परा, संस्कृति तथा ऐतिहासिक महत्वलाई उजागर गर्दै आर्थिक तथा पर्यटन प्रवर्द्धनमा टेवा पुर्याउने उद्देश्यले यो महोत्सव प्रत्येक वर्ष आयोजना गरिँदै आएको छ। महोत्सवका क्रममा लोकसंगीत, नृत्य, मेलापर्व, प्रदर्शनी तथा विभिन्न प्रतियोगिताहरूको आयोजना गरिनेछ, जसले स्थानीय समुदायलाई सांस्कृतिक रूपमा समेट्नेछ।
छलफलपछि सांसद साहले सबै सरोकारवाला निकायहरूलाई महोत्सवलाई अझ व्यवस्थित तथा सफल बनाउन सामूहिक प्रयास गर्न आग्रह गर्नुभयो। उहाँले नगरपालिकालाई समेत महोत्सवका लागि आवश्यक पूर्वाधार तथा व्यवस्थापन पक्षलाई सुदृढ गर्न निर्देशन दिनुभयो।
स्थानीय तह, राजनीतिक दल, समाजसेवी, व्यापारी, विद्यार्थी र स्थानीय बासिन्दाहरूको सक्रिय सहभागितामा मौलापुर मधानी महोत्सव २०८१ भव्य र ऐतिहासिक बनाउन कुनै कसर बाँकी नराख्ने प्रतिबद्धता आयोजक समितिले जनाएको छ।
