प्रदीप कुमार दास, रौतहट।
मंसिर ११ गते , बिहीबार ।
मधेस प्रदेशकी गृह, कानुन तथा सञ्चार मन्त्रालयकी प्रमुख तथा प्रदेश सभा सदस्य माननीय बिमला अन्सारी काठमाडौंमा संघीय गृहमन्त्री ओम प्रकाश अर्याल र नेपाल प्रहरीका प्रहरी महानिरीक्षक (आईजीपी) दानबहादुर कार्कीसँग विशेष राजनीतिक तथा सुरक्षा विषयक छलफलमा सहभागी भएकी हुन् ।
गृहमन्त्रालयमा बसेको यो संयुक्त बैठकलाई मधेस प्रदेशको शान्ति–सुरक्षा सुदृढीकरण र आगामी निर्वाचनको तयारीका दृष्टिले अत्यन्तै महत्त्वपूर्ण भेटका रूपमा हेरिएको छ।
बैठकमा मन्त्री अन्सारीले मधेस प्रदेशमा पछिल्लो समय देखिएका सुरक्षासम्बन्धी चुनौती, अपराध नियन्त्रणमा प्रशासन–प्रहरी समन्वय, सामाजिक सद्भावका मुद्दा तथा संघ–प्रदेशबीचको कार्यगत सहयोगका विषयमा विस्तृत अभिव्यक्ति राखिन्।
उनको प्रस्तुतिपछि गृहमन्त्री अर्यालले केन्द्र सरकार प्रदेशको सुरक्षा संवेदनशीलताबारे पूर्ण सचेत रहेको बताउँदै “मधेस प्रदेशमा स्थायित्व र सुरक्षा बलियो बनाउन संघ–प्रदेश एकसाथ अघि बढ्छौं,” भन्ने स्पष्ट आश्वासन दिए।
आगामी फागुन २१ गतेका लागि तोकिएको निर्वाचनबारे संघीय गृहमन्त्रीले सरकारले निर्धारपूर्वक तयार भइरहेको उल्लेख गर्दै आवश्यक सुरक्षा व्यवस्था कडाइका साथ लागु गरिने बताए।
प्रदेश र केन्द्रका सुरक्षा निकायबीचको संयुक्त समन्वयले निर्वाचनपूर्व देखिएका सम्भावित जोखिम न्यून हुने विश्वास व्यक्त गरिएको छ।
कार्यसूचीकै अर्को केन्द्रमा मन्त्री अन्सारीको प्रमुख माग थियो—प्रहरी समायोजन ऐन यथाशीघ्र अघि बढाउन।
उनले समायोजन ऐन ढिलाइले प्रदेशमा प्रशासनिक तथा सुरक्षात्मक संरचनामा अनिश्चितता बढेको बताउँदै यसले सेवा–सुरक्षाको प्रभावकारितामा समेत असर परेको बुझाइ राखिन्।
“समायोजन प्रक्रियाले गति पाए प्रदेशले अझ सुव्यवस्थित र परिणाममुखी सुरक्षा सेवा प्रदान गर्न सक्छ,” उनले भनिन्।
हालै सार्वजनिक तथा निजी सम्पत्तिमाथि भएका तोडफोड, संघीय संसद् भवन, सर्वोच्च अदालत र राष्ट्रपति कार्यालयजस्ता संवेदनशील संरचनामा भएको क्षतिका घटनाले सरकारले विशेष सतर्कता अपनाइरहेको छ।
यी गतिविधि वास्तविक आन्दोलनकारी नभई अस्थिरता सिर्जना गर्ने समूहको कार्य हुनसक्ने संकेतप्रति मन्त्री अन्सारीले गम्भीर ध्यानाकर्षण गराउँदै सबै तहका निकायलाई उच्च सतर्कता अपनाउन आग्रह गरिन्।
