काठमाडौँ । प्रमुख प्रतिपक्षी नेकपा (एमाले)का अध्यक्ष केपी शर्मा ओलीले जनताका समस्या समाधानका लागि पहाडै पहाडको बाटो जनताको सुझाव संकलन गर्न हिँडेको बताएका छन् ।
एमालेले सञ्चालन गरेको ‘झुलाघाट–चिवाभञ्ज्याङ, समृद्धिका लागि सङ्कल्प यात्रा’ अभियानको क्रममा सल्यानको सल्लीबजारमा आयोजित आमसभालाई सम्बोधन गर्दै ओलीले आफूहरुले जनताको समस्या अध्ययन र समाधानको लागि अभियानमा हिँडेको बताए । उनले भने, ‘‘अभियानका क्रममा जनताको समस्याको स्थगत अध्ययन ग्रामीण क्षेत्रका जनताका सुझाव सङ्कलन गर्नुको साथै त्यहाँको विकासको अवस्थालाई राम्रोसँग नियालिएको छ ।’’
एमाले सरकार हुँदाका बखत थालिएका परियोजना अहिलेको गठबन्धन सरकारले रोकेको छ । उनले भने, ‘‘विकास, सुशासन स्थापना र भ्रष्टाचार नियन्त्रणको अवस्था बिग्रदो रहेको छ । हामीले अघि सारेका स्वास्थ्य, शिक्षा, पूर्वाधार लगायतका अनेक क्षेत्रको विकास रोकिएको छ ।’’
‘‘राजनीतिक अस्थिरता, आर्थिक समाजिक र सांस्कृतिक रुपमा देश ओरालो लागेको छ’’, ओलीले भने ।
