प्रदीप दास, रौतहट ।
फागुन १० गते,शनिबार ।
रौतहट जिल्लाको माधवनारायण नगरपालिकामा नेपाल कम्युनिस्ट पार्टी (नेकपा) एमालेका नगर कमिटीका अध्यक्षमा उपेन्द्र प्रसाद साह सर्वसहमतिले निर्विरोध निर्वाचित हुनुभएको छ। एकीकृत एवं सशक्त नेतृत्वको आवश्यकता रहेको नगरपालिकामा साहको नेतृत्वले पार्टीलाई थप व्यवस्थित र बलियो बनाउने अपेक्षा गरिएको छ।
नगर कमिटीको हालै सम्पन्न बैठकबाट सर्वसहमतिले अध्यक्ष पदमा निर्वाचित हुनुभएका साह सामाजिक सेवामा समेत विशेष योगदान पुर्याउँदै आउनुभएको एक परिचित अनुहार हुनुहुन्छ। उहाँ विगतमा आम जनता पार्टीका नगर कमिटी अध्यक्षको भूमिकामा रहिसक्नुभएको छ। जनताको पक्षमा काम गर्ने उहाँको प्रतिबद्धता र समाज परिवर्तनका लागि देखाएको सक्रियताले नै उहाँलाई नेकपा एमालेको शीर्ष नेतृत्वमा पुर्याउन सहयोग पुगेको राजनीतिक विश्लेषकहरू बताउँछन्।
उपेन्द्र प्रसाद साह केवल राजनीतिक व्यक्तित्व मात्रै नभई समाजसेवीका रूपमा पनि चिनिनुभएको छ। शिक्षा, स्वास्थ्य, सडक पूर्वाधार विकास तथा युवा सशक्तीकरणका क्षेत्रमा उहाँको सक्रियताले स्थानीय समुदायमा गहिरो प्रभाव पारेको छ। विपन्न वर्ग र असहायको सेवामा समर्पित रहँदै आउनुभएको साहको सामाजिक क्रियाकलापले उहाँलाई नगरवासीहरूको मन जित्न सफल बनाएको छ।
नेकपा एमालेको नगर कमिटीको नेतृत्व सम्हालिसकेपछि साहले पार्टीभित्र एकता र अनुशासनलाई प्राथमिकता दिने बताउनुभएको छ। उहाँले नगरका समग्र विकासका लागि पार्टीका नीतिहरूलाई व्यवहारमा उतार्ने र जनताको भरोसा जित्ने प्रतिवद्धता जनाउनुभएको छ। साहले भन्नुभयो, “नगरको विकासका लागि राजनीतिक स्थिरता र सुशासन आवश्यक छ। म सम्पूर्ण नगरवासीहरूलाई साथ लिएर माधवनारायणलाई नमुना नगरपालिका बनाउने दृढ प्रतिज्ञामा छु।”
पूर्व आम जनता पार्टीमा अध्यक्ष रहँदा साहले जनताका समस्यालाई प्राथमिकताका साथ उठाउनुका साथै तिनको समाधानका लागि विभिन्न पहलहरू गर्नुभएको थियो। पार्टी परिवर्तन भए पनि उहाँको विकासप्रतिको दृष्टिकोणमा कुनै परिवर्तन आएको छैन। अहिले नेकपा एमालेको नगर नेतृत्व सम्हालिसकेपछि उहाँले माधवनारायण नगरपालिकालाई सामाजिक तथा आर्थिक रूपले समृद्ध बनाउने योजनालाई सार्थक बनाउने संकेत दिनुभएको छ।
उहाँका अनुसार स्थानीय तहमा रोजगारीका अवसर सृजना, गुणस्तरीय शिक्षाको पहुँचमा वृद्धि, स्वास्थ्य सेवामा सुधार, महिला सशक्तीकरण र कृषि क्षेत्रको आधुनिकीकरण प्राथमिक एजेन्डा हुनेछन्। उहाँले पार्टीका सम्पूर्ण कार्यकर्ता र नगरवासीहरूलाई एकजुट भई नगर विकासमा सहकार्य गर्न आह्वान गर्नुभएको छ।
उपेन्द्र प्रसाद साहको निर्विरोध निर्वाचनलाई माधवनारायण नगरवासीहरूले स्थायित्व र विकासको दृष्टिले सकारात्मक संकेतका रूपमा लिएका छन्। स्थानीय राजनीतिक वृत्तमा साहको व्यावसायिकता, इमानदारी र समर्पणको चर्चा भइरहेको छ। नागरिकहरूले उहाँको नेतृत्वमा नगरपालिकाले सामाजिक, सांस्कृतिक र आर्थिक विकासमा नयाँ आयाम थप्ने विश्वास व्यक्त गरेका छन्।
