प्रदीप सम्राट, रौतहट ।
अषाढ २६ गते, बिहीबार ।
रौतहट जिल्लाको गरुडा नगरपालिका विगत केही वर्षदेखि जनताको आवश्यकता र समस्यालाई सम्बोधन गर्ने नेतृत्वदायी भूमिका निर्वाह गर्दै आएको छ। यही क्रमलाई निरन्तरता दिँदै हालै नगर प्रमुख कन्थमणी प्रसाद जयसवालको नेतृत्वमा दुई महत्वपूर्ण कार्य सम्पन्न भएका छन्—सिसवा धमौरा गाउँको सिँचाइ कुलो सफाइ तथा गरुडा र पोठियाही क्षेत्रमा टावर लाइट जडान र उद्घाटन गर्नु भएको हो ।
गरुडा नगरपालिका वडा नं. ९ अन्तर्गत पर्ने सिसवा धमौरा गाउँका स्थानीयवासीहरू केही दिनदेखि नहरको सिँचाइको पानीले जाम भएको कुलोको समस्याबाट पिरोलिएका थिए। पानी जमेर खेतमा पुग्न नसक्ने अवस्था सिर्जना भएपछि कृषकहरू चिन्तित थिए। समस्या गम्भीर बन्दै जाँदा स्थानीयवासीहरूले नगरपालिकासमक्ष गुहार मागेका थिए।
यस जानकारी प्राप्त भएको केही घण्टाभित्रै नगर प्रमुख कन्थमणी प्रसाद जयसवाल आफैं स्थलगत निरीक्षणका लागि पुग्नु भएको थियो। उहाँले समस्या केवल हेरफेर गरेर होइन, तत्काल समाधान गर्नुपर्ने बताउँदै आजैदेखि कुलो सफाइ कार्य सुरु गराउने आदेश दिनुभयो।
नगर प्रमुख जयसवालले निरीक्षणका क्रममा भने, “समस्या देखेर टुलुटुलु हेर्नु होइन, समाधानमा जुट्नु नै सच्चा नेतृत्व हो। जनताको पीडा बुझ्न प्रशासनिक कुर्सीमा होइन, खेतको बीचमै उभिनु पर्छ।”
कुलो सफाइ कार्यले अब सिँचाइ सहज बनाउने, ढुवानी व्यवस्थापनमा सुधार ल्याउने र सामुदायिक स्वास्थ्यमा सकारात्मक प्रभाव पार्ने विश्वास गरिएको छ। नगरपालिकाले यस्ता समस्यालाई दीर्घकालीन रूपमा समाधान गर्न दीर्घकालीन रणनीति बनाइरहेको जनाएको छ।
त्यसैगरी, जनजीवनको सुरक्षालाई सुनिश्चित गर्ने उद्देश्यले गरुडा नगरपालिका वडा नं. ५ र ६ अन्तर्गतका गरुडा बजार क्षेत्र र पोठियाही बस्तीमा टावर लाइट जडान कार्य सम्पन्न गरिएको छ। बिहीबार साँझ नगर प्रमुख कन्थमणी प्रसाद जयसवालले बत्ती बालेर यसको औपचारिक उद्घाटन गर्नुभयो।
उद्घाटन समारोहमा बोल्दै उहाँले भन्नुभयो: “हाम्रो लक्ष्य रात पनि उज्यालो बनाउने हो। नागरिकको जीवन केवल दिनमा होइन, रातको समयमा पनि सुरक्षित र सहज हुनुपर्छ।”
टावर लाइटको जडानले रातको समयमा हिँडडुल गर्न सहज बनाउने, महिला तथा बालबालिकाहरूको सुरक्षामा टेवा पुर्याउने र आपराधिक गतिविधिमा कमी ल्याउने अपेक्षा गरिएको छ। स्थानीयवासीहरूले समेत टावर लाइटको उद्घाटनलाई खुसीपूर्वक स्वागत गर्दै यस्तो पहलले उनीहरूको जीवनशैलीमा वास्तविक सुधार ल्याउने जनाएका छन्।
गरुडा नगरपालिकाले “जनताको आवश्यकता, हाम्रो योजना” भन्ने भावनालाई आत्मसात गर्दै विगतदेखि नै स्थानीय आवश्यकता पहिचानमा आधारित कार्यक्रमहरू सञ्चालन गर्दै आएको छ। चाहे त्यो सडक निर्माण होस्, सिँचाइ सुविधा सुधार होस्, वा सार्वजनिक सुरक्षाका लागि टावर लाइट—सबैमा नगरप्रमुखको सक्रियता प्रत्यक्ष देखिन्छ।
