प्रदीप सम्राट, रौतहट
चैत ०९, सोमबार ।
गर्मी मौसमको सुरुवातसँगै रौतहटको बृन्दावन नगरपालिकामा लामखुट्टेको आतंक बढ्दै गएपछि त्यसको नियन्त्रणका लागि व्यापक अभियान सुरु गरिएको छ। डेंगु र मलेरिया जस्ता सरुवा रोग फैलिन सक्ने जोखिम बढेपछि नगरपालिकाले पूर्वसावधानीस्वरूप विषादी छर्ने कार्यक्रमलाई प्राथमिकताका साथ अगाडि बढाएको हो।
नगर प्रमुख विनोद प्रसाद कुर्मीका अनुसार प्रारम्भिक योजना अनुसार चैत १३ गतेदेखि अभियान सुरु गर्ने तयारी भए पनि नागरिकको स्वास्थ्य सुरक्षालाई ध्यानमा राख्दै निर्धारित मितिभन्दा अघि नै कार्य थालिएको हो। “जनताको स्वास्थ्य हाम्रो पहिलो प्राथमिकता हो,” उनले भने, “त्यसैले तत्कालै प्रभावकारी कदम चाल्न आवश्यक ठानेर आजैदेखि वडा नं. ८ बाट ‘एयर स्प्रे’ सुरु गरेका छौं।”
नगरपालिकाले बिहान र बेलुका निश्चित तालिका बनाएर विषादी छर्ने व्यवस्था मिलाएको जनाएको छ। ‘एयर स्प्रे’सँगै पम्प स्प्रे प्रविधि प्रयोग गरेर घर–घर नजिकका स्थानमा समेत विषादी छरिनेछ। साथै, लामखुट्टेको लार्भा नष्ट गर्ने उद्देश्यले पानी जम्ने स्थानहरूको पहिचान गरी विशेष अभियान पनि सँगसँगै सञ्चालन गरिएको छ।
प्राविधिक समस्या अर्थात् मेशिन बिग्रिएका कारण केही ढिलाइ भए पनि अहिले अभियान प्रभावकारी रूपमा सञ्चालनमा आएको नगर प्रमुख कुर्मीले जानकारी दिए। उनका अनुसार अबको एक साताभित्र नगरभित्रका सबै ९ वटै वडामा चरणबद्ध रूपमा अभियान सम्पन्न गरिनेछ।
नगरपालिकाले वडास्तरमै योजना निर्माण गरी स्थानीय जनप्रतिनिधि र कर्मचारीको समन्वयमा अभियानलाई थप प्रभावकारी बनाउने रणनीति लिएको छ। यस अभियानलाई सफल बनाउन स्थानीय बासिन्दाको सक्रिय सहभागिता अपरिहार्य हुने भन्दै नगरपालिकाले सबैलाई सचेत रहन आग्रह गरेको छ।
विशेषगरी घर वरिपरि पानी जम्न नदिन, फोहोर व्यवस्थापनमा ध्यान दिन, पुराना टायर, भाँडा वा अन्य वस्तुमा पानी थुप्रिन नदिन तथा नियमित सरसफाइ गर्न नागरिकलाई अनुरोध गरिएको छ। स्वास्थ्य विज्ञहरूका अनुसार यस्ता साना सावधानीले नै डेंगु र मलेरिया जस्ता रोगबाट बच्न ठूलो मद्दत पुग्ने गर्दछ।
बढ्दो गर्मीसँगै देखा पर्ने स्वास्थ्य जोखिमलाई न्यूनीकरण गर्न नगरपालिकाले थालेको यो अभियानले स्थानीयवासीमा सकारात्मक सन्देश दिएको छ। समयमै गरिएको यस्तो पहलले सम्भावित महामारीलाई नियन्त्रणमा लिन सक्ने देखिएको छ ।
